Kvöldganga á Esju 09.03.2010

Kvöldganga á Esju. Þrjátíu manna hópur staðráðinn að ná sér í lopahúfu lagði af stað inn í þokuna upp á Langahrygg og upp fyrir Stein. Veður var mjög blautt, þykk þoka og mikil aurbleyta í fjallinu. Þegar við komum upp að Steini var eins og hefði fallið aurskriða þarna uppfrá. Fórum aðeins upp fyrir Steininn að snjólínu og ákváðum að snúa við enda svarta þoka. Gengum svo niður göngustíginn að Esjustofu. Þrátt fyrir ágætan fatnað var ég blautur í gegn þegar ég kom niður.

Myndir úr ferðinni!

Ath! upplýsingar í töflunni eru úr GPS tækinu mínu.
Einnig er hægt að hlaða niður korti af gönguleiðinni í PDF skjali hér að neðan.  

Fjall:	Esja - Langihryggur upp að Steini
Dagur:	þri 09-03-2010
Upphaf kl:	18:02
Hæsta punkti náð kl:	19:37
Uppgöngutími:	1 klst 35 mín
Göngulok kl:	20:35
Göngutími alls:	2 klst 33 mín
Upphafshæð GPS:	17 m
Mesta hæð GPS:	621 m
Hækkun:	604 m
Göngulengd:	6,8 km

Skrár tengdar þessari bloggfærslu:

• Gönguleiðin Esja - Langihryggur - Steinn 1 - PDF
• Gönguleiðin Esja - Langihryggur - Steinn 2 - PDF

Kvöldganga á Esju 08.03.2010

Kvöldganga á Esju. Gengið var upp í Gunnlaugsskarð. Veður var milt en þoka og blautt, með smá snjókomu efst í fjallinu. Um þrjátíu manns tóku þátt í göngunni, þar af voru nokkrir Þorparar eins og ég. Myndirnar sem ég tók eru ekki þær bestu en gaman að sjá fólk á göngu í rökkrinu.

Myndir úr ferðinni!

Ath! upplýsingar í töflunni eru úr GPS tækinu mínu.
Einnig er hægt að hlaða niður korti af gönguleiðinni í PDF skjali hér að neðan. 

Fjall:	Esja upp í Gunnlaugsskarð
Dagur:	mán 08-03-2010
Upphaf kl:	18:00
Hæsta punkti náð kl:	19:35
Uppgöngutími:	1 klst 35 mín
Göngulok kl:	20:47
Göngutími alls:	2 klst 47 mín
Upphafshæð GPS:	17 m
Mesta hæð GPS:	565 m
Hækkun:	548 m
Göngulengd:	9,2 km

Skrár tengdar þessari bloggfærslu:

• Gönguleiðin Esja-Gunnlaugsskarð 1 - PDF
• Gönguleiðin Esja-Gunnlaugsskarð 2 - PDF

Valahnjúkar 06.03.2010

Þorparar eru eins og allt annað venjulegt fólk sem vaknar snemma á morgnana, keyrir útfyrir bæinn til að ganga í kaldri rigningu í ökladjúpu vatni eða aur og þá helst upp í mót. Á laugardaginn sl. gengu þorparar á Valahnjúka og umhverfis Helgafell í rigningu og bleytu. Þrátt fyrir að hafa farið margar ferðir á Helgafell og nágrenni þá hef ég aldrei komið á Valahnjúkana sjálfa. Ferðin hófst á bílastæðinu við Kaldársel og var gengið hægra megin við vatnsból Hafnfirðinga. Sveigt var til vinstri fyrir ofan vatnsbólið, gengið yfir hrygginn inn í Valaból. Þar var sungið "í Hlíðarendakoti". þá var farið í leikinn "hvað komast margir inn í hellinn í Valabóli?"; svar: Allir í hópnum! Frá Valabóli var stímt upp á Valahnjúkahrygginn og gengið með honum endilöngum (ASA). Við endahnjúkinn var farið niður hægra megin (SV) og freistað á hringferð um Helgafell. Nokkrir fóru hinsvegar á Húsfell til að vinna upp gamlar syndir. Við hin gengum í átt að Helgafelli og svo inn í hraunið þar til við komum inn á línuveginn. Farið var aðeins lengra inn í hraunið til að finna fallegar hraunmyndarnir sem sumir segja einskonar dvergvaxnar Dimmuborgir. Því miður var snjór yfir og misstum við af þessari dýrð. Við snérum aftur inn á línuveginn og kláruðum hringinn um Helgafell með því að ganga  í stefnu að Kalárselsvatnsbólinu yfir helluhraunið milli Gvendarselshæðar og Helgafells. Þar biðu bílarnir okkar spakir. Eftir ferðina fór ég á kjörstað og kaus á móti Ice-Save og tók þátt í skoðanakönnun um sameiningarvandamál Álftnesinga. Þá var gengið til lauga í heitapott Álftaneslaugar og rædd stjórnmál við nærstadda.

Myndir úr ferðinni!

Myndir af myndavef FÍ

Ath! upplýsingar í töflunni eru úr GPS tækinu mínu.
Einnig er hægt að hlaða niður korti af gönguleiðinni í PDF skjali hér að neðan.

Fjall:	Valahnjúkar & hringur um Helgafell
Dagur:	lau 06-03-2010
Upphaf kl:	08:57
Hæsta punkti náð:	10:11
Uppgöngutími:	1 klst 14 mín
Göngulok kl:	11:49
Göngutími alls:	2 klst 52 mín
Upphafshæð GPS:	86 m
Mesta hæð GPS:	229 m
Hækkun	143 m
Göngulengd	9,1 km

Skrár tengdar þessari bloggfærslu:

• Gönguleiðin á Valahnjúka 1 - PDF
• Gönguleiðin á Valahnjúka 2 - PDF

Helgafell 27.02.2010

Nú var komið að Helgafelli í Mosfellsbæ sem er fjall númer 8 af 52 sem við ætlum að ganga á á þessu ári. Þorparar hittust á bílastæði undir Helgafelli sem er við þingvallaafleggjarann yst í Mosfellsdal. Eftir upphitun á planinu var ætt af stað beint af augum upp næsta malarkamb. Í fyrstu snjóaði svolítið en svo jókst snjókoman með þéttum vindi. Þegar við vorum komin upp á kambinn var stoppað og sungið af blöðum lagið "þorparinn" eftir Magnús Eiríksson, en það mun verða einkennislag hópsins. Líklegast hefur söngæfing þessi hljómaði eins og útburðarvæl enda minnti hópurinn frekar á hrossastóð á heiði en skagfirskum hetjukór. Svo var gengið áfram í stórum boga ragnsælis með brekkubrúninni uns við komum að því sem mætti telja toppinn á fjallinu. En þar er gamall steyptur landmælingastólpi. GPS tækið mitt mældi 234 metra hæð á þessum hól en ég held að Helgafellið sé ekki nema 217 metrar. Hér sést hver hæðarskekkjan getur verið í þessum tækjum, allt að 12-15 metrum til eða frá. Skekkjan er minni á lengdar- og breiddarbaug, þar er um að ræða kannski 3 til 4 metra radíus. þá var haldið áfram og leitað að niðurleið (eða það héldum við), flestir voru með augun pírð aftur eða þoku á gleraugunum. Í snjófjúkinu gengum við of langt framhjá niðurleiðinni og fórum nærri hálfan hring um fjallið. Þá fannst okkur nóg um, snérum við og gengum aftur með vindi þar til við fundum niðurleiðina og stungum okkur þar niður. Leiðin var greið eftir það að bílunum. Þessi útúrdúr sést vel á gönguleiðakortinu hér að neðan enda er gönguferillinn stórglæsilegt afrek og annað eins hefur ekki sést á mynd síðan stóra hnúta- og flækjubókin var gefin út. Sannkallað þorparabragð. þó allt hafi gengið vel og engin hætta á ferð minnir þetta mann á að það þarf ekki mikið að bera útaf, meira segja fyrir vanan mann, til að taka villustefnu þegar skellur á hríðarbylur. Annars var þetta hressandi og snörp íslensk vetrarganga með engu útsýni og voru allir rífandi glaðir og rjóðir í kinnum þegar niður var komið. Eftir gönguna fór ég í sundlaugina á Álftanesi og lét mér líða vel.

Myndir úr ferðinni!

Myndir af myndavef FÍ

Ath! upplýsingar í töflunni eru úr GPS tækinu mínu.
Einnig er hægt að hlaða niður korti af gönguleiðinni í PDF skjali hér að neðan.

Fjall:	Helgafell í Mosfellsbæ
Dagur:	lau 27-02-2010
Upphaf kl:	09:13
Hæsta punkti náð kl:	10:01
Uppgöngutími:	48 mín
Göngulok kl:	10:49
Göngutími alls:	1 klst 36 mín
Upphafshæð GPS:	66 m
Mesta hæð GPS:	234 m
Hækkun:	168 m
Göngulengd GPS:	4,3 km

Skrár tengdar þessari bloggfærslu:

• Gönguleiðin á Helgafell 1 - PDF
• Gönguleiðin á Helgafell 2 - PDF

Húsfell 20.02.2010

Einhvern tíma heyrði ég af fyrirbæri sem var kallað "10 á toppnum" og var þar átt við gamla Bronco jeppa sem komu til landsins með læstu afturdrifi (no-spin). Þessum drifbúnaði voru margir íslendingar ekki vanir. Búnaðurinn hafði þá (ó)náttúru þegar ekið var á malbiki og teknar krappar beygjur hvellsmall í drifinu með snöggum kippum og tók bíllinn stundum stjórnina af bílstjóranum með þeim afleiðingum að þeir ultu á toppinn. Þetta á hinsvegar ekki við um "52 á toppnum" því þar er allt undir Kontról. Nú var fjall númer 7 í sigtinu, Húsfell fyrir ofan Heiðmörk í Garðabæ/Hafnarfjörð. Hópurinn hittist á bílastæðinu við kaldársel ofan við Hafnarfjörð í blíðu og einstakri ljósadýrð á svölum laugardagsmorgni. Hafist var handa við upphitunarleiki, jafnvægiskúnstir, hopp og teygingar. Þá var lagt af stað og gengið eins og þegar farið er á Helgafell en haldið áfram á milli Helgafells og Valahnjúka. Þetta er greinileg leið, gamall smalavegur og reiðstígur. Þegar komið er fyrir endann á Valahnjúkshryggnum sveigir vegurinn til vinstri og sést þá Húsfell eins og eyja í hraunhafi. Svo var gengið yfir mosavaxna hraunölduna og áð í grænni lautu smá stund áður en lagt var á hallann. Gengið var upp suðvestur öxlina og er auðveld og jöfn ganga. Á uppleiðinni var rekinn kosningaáróður fyrir nafni hópsins enda stóð til að kjósa milli "Nágrannar" og "Þorparar" þegar toppnum var náð. Var ýmsu lofað og nú er bara að bíða og heyra hvernig fagurgalinn hljómar. Kosið var með fótunum og gengið í tvær fylkingar. Niðurstaðan var afgerandi "Þorparar" skal hann heita. Tekin var hópmynd á toppnum og svo niður bratta skriðu norðvestan megin. þá var gengið til baka í Valaból og stoppað smástund þar. Eftir skemmtilegar teygingar á bílaplaninu lokaði ég ferðinni eins og venjulega með sundtökum í Álftaneslauginni. 

 

Myndir úr ferðinni!

Myndir af myndavef FÍ

Ath! upplýsingar í töflunni eru úr GPS tækinu mínu.
Einnig er hægt að hlaða niður korti af gönguleiðinni í PDF skjali hér að neðan. 

Fjall:	Húsfell
Dagur:	lau 20-02-2010
Upphaf kl:	09:12
Hæsta Punkti náð kl:	10:33
Uppgöngutími:	1 klst 21 mín
Göngulok kl:	12:15
Göngutími alls:	3 klst 03mín
Upphafshæð GPS:	82 m
Mesta Hæð GPS:	306 m
Hækkun:	224 m
Göngulengd GPS:	10,4 km

Skrár tengdar þessari bloggfærslu:

• Gönguleiðin á Húsfell - pdf

Móskarðshnjúkar 14.02.2010

Nú var röðin komin að Móskarðshnjúkum. Fjalli númer 6 hjá hópnum og eru þá aðeins 46 fjöll eftir áður en árið er úti. Allir í hópnum verða látnir sverja upp á æru og trú að þeir ætli að klára prógrammið. Ég bakka ekki út úr þessu enda er ég orðheldinn maður. Ég á hinsvegar eftir að ganga plankann sem Páll kom með sem staðgengil stokksins sem allir eiga að stíga á. En nú stóð til að stíga á tind Móskarðshnjúks(a).
Þeir sem ekki vita hvernig á að komast sem næst fjallinu til að hefja göngu skulu nú taka eftir. Akið inn Mosfellsdalinn og beygið inn fyrsta afleggjara til vinstri eftir að ekið er framhjá Gljúfrasteini, húsi Halldórs Laxness. Afleggjarinn er merktur "Hrafnhólar" og stendur græn kofastrýta við veginn. Akið eftir veginum og farið yfir brúnna framhjá gulum og rauðum bæjarhúsum og svo meðfram ánni. Ekki skal yfir vaðið á ánni heldur er beygt til hægri og farið í gegnum hliðið (muna að loka á eftir sér) og ekið inn veginn framhjá nokkrum sumarhúsum þar til komið er að enda vegarins en þar er bílaplan. Vegurinn getur stundum verið erfiður en fær flestum bílum yfirleitt. Gengið er yfir ánna á göngubrú og aðeins eftir veginum og aftur yfir litla á. þá er sveigt af veginum, upp melana og stefnt á öxlina hægra megin við áberandi gráan stapa sem ég held að heitir Gráhnjúkur. Þegar komið er upp á hrygginn er farið til vinstri eftir hryggnum upp að áberandi skáskorinni leið sem liggur að skarðinu milli austustu hnjúkanna. þetta sést vel á korti af gönguleiðinni sem við gengum og hægt er að hlaða niður hér að neðan. Kalt var í veðri lágskýjað með snjófjúki og ekki útlit fyrir gott skyggni. En það rofaði til öðruhvoru með fögru útsýni og þegar við vorum hlémegin við tindinn þá blússaði hitinn upp og ríkti hálfgerð Alpa-stemning. Á niðurleiðinni komum við á upp á stapa sem ég held að heiti Gráhnjúkur og stálumst í nokkrar kleinur sem hugulsöm kona hafði borið með sér á tindinn og til baka. Á þessu var smjattað á meðan dáðst var að útsýninu. Þegar komið var niður á bílaplan biðu okkar fleiri pönnukökur og kleinur í boði afmælisbarna fyrri 6 mánaða árs. í næsta mánuði munu svo haustbörnin bjóða bakkelsið. Ég er ekki viss um hvort ég hafi grennst eða bætt á mig í þessari ferð. Eftir kleinuátið brunaði ég svo beint í Álftaneslaugina og skriðsynti 200 metrana. Svo var slappað af í pottinum. 

Myndir úr ferðinni!

Myndir af myndavef FÍ

Ath! upplýsingar í töflunni eru úr GPS tækinu mínu en ekki af viðurkenndu landakorti.
Einnig er hægt að hlaða niður korti af gönguleiðinni í PDF skjali hér að neðan. 

Fjall:	Móskarðshnjúkar
Dagur:	sun 14-02-2010
Upphaf kl:	11:20
Hæsta punkti náð kl:	13:08
Uppgöngutími:	1 klst 48 mín
Göngulok kl:	14:37
Göngutími alls:	3 klst 17 mín
Upphafshæð GPS:	115 m
Mesta hæð GPS:	828 m
Hækkun:	713 m
Göngulengd GPS:	7,3 km

Skrár tengdar þessari bloggfærslu:

• Gönguleiðin á Móskarðshnjúka

Skálafell 07.02.2010

Lögðum af stað frá bílastæðinu við skíðaskálann eftir smá upphitun. Búið var að skipta stóra hópnum upp í þrjá minni um 50 einstaklingar í hverjum hópi. Einn hópurinn lagði á Móskarðshnjúka, annar á Húsfell ofan Garðabæjar og okkar hópur átti að storma á Skálafell. Hópurinn okkar var myndaður af fólki úr nágrannasveitarfélögum Reykjavíkur, þ.e.a.s. þeim sem ekki áttu heima á Seltjarnarnesi, vestur- eða austurhluta Reykjavíkur. Hugmyndir komu um tvö nöfn á hópinn okkar; "Nágrannar" eða "Þorparar". Mér skilst að þetta verði ákveðið síðar í kosninum. Veðrið var svalt á bílastæðinu og kólnaði eftir því sem ofar kom. Á uppleiðinni ræddum við heimspeki og heilsumál þjóðarinnar; Haraldur, Eyþór og ég. Þetta er orðinn fasti í göngunum hjá okkur að ræða efni morgunþáttarins "Heimur Hugmyndanna" og höfum við gaman af, enda hefur verið sagt að göngutúrinn sé besti vinur heimspekingsins. Í skjóli við endurvarpsstöðina á Skálafelli mynduðum við hring og var farið í nafnaleik til að læra nöfn allra í hópnum. Ég verð að viðurkenna að þekki ég nú ekki alla þrátt fyrir að vera næstum síðastur í röðinni í leiknum og þurfti að endurtaka öll nöfnin á þeim sem voru á undan mér áður en ég fékk að kynna mig. Eftir að hafa leikið okkur um stund og fengið okkur hressingu sáum við til hópsins sem var að þokast upp Móskarðshnjúkana. Ákveðið var að ganga út á nef Skálafells næst Móskarðshjúkum og veifa til hins hópsins. Vindur var nokkuð stífur og frostið beit í kinnar því var stansað stutt og gefin frjáls ferð niður, sem einhver gárungurinn kallaði "óheftan niðurgang". Við gengum niður snjólausar skíðabrekkurnar. Skemmtileg ganga í björtu veðri með góðu útsýni, hæfilega erfið ganga sem kom mér á óvart. Ég þarf ekki að taka það fram að eftir ferðina gekk ég til lauga á Álftanesi.

Myndir úr ferðinni!

Myndir af myndavef FÍ

Ath! upplýsingar í töflunni eru úr GPS tækinu mínu en ekki af viðurkenndu landakorti.
Einnig er hægt að hlaða niður korti af gönguleiðinni í PDF skjali hér að neðan.

Fjall:	Skálafell
Dagur:	sun 07-02-2010
Upphaf kl:	10:55
Hæsta punkti náð kl:	12:11
Uppgöngutími:	1 klst 16 mín
Göngulok kl:	14:00
Göngutími alls:	3 klst 05 mín
Upphafshæð GPS:	388 m
Mesta Hæð GPS:	790 m
Hækkun:	402 m
Göngulengd GPS:	7,6 km

Skrár tengdar þessari bloggfærslu:

• Gönguleiðin á Skálafell

Grímannsfell 31.01.2010

Á sunnudagsmorgni síðasta degi janúarmánaðar mætti stóri hópurinn á bílastæðið við Gljúfrastein í Mosfellsdal.  Nú átti að takast á við "fjall skáldsins" Grímannsfell. Frábært veður og kjöraðstæður til göngunnar; stilla, bjart og hiti rétt undir frostmarki. Fyrst var byrjað á smá morgunleikfimi á bílastæðinu en svo var hópnum skipt upp í tvo hópa sem gengu sitthvoru megin við köldukvísl en sameinuðust aftur rétt áður en við komum að Helgufossi. Við fossinn tóku margir myndir enda sérstaklega fallegur foss. Nokkru lengra fyrir ofan foss var farið að leita að heppilegu vaði yfir ánna. Svo hófst hin eiginlega uppgangur á fjallið. Þetta er jöfn og þægileg hækkun. Einna verst þótti mér að ekki var farið alveg á hábungu fjalllsins og vantaði lítið upp á, ekki nema 20 metra hækkun og ef til vill um 1 km krók fram og til baka. Einhverjir hlupu á toppinn en ég fylgdi konunni minni og hópnum sem stóð kyrr. Þetta er því aðeins hálfunnið verk í mínum huga og mun ég bæta úr því síðar. Þegar komið var á þann stað sem hópurinn fór hæst tókum við upp nestisbita og drukkum kaffi. Útsýni af fjallinu er gott og sést vel til allra átta. Svo var gengið niður og tæplega 9 km hring lokað aftur á bílastæðinu við Gljúfrastein. Ferðinni hjá mér lauk svo með reglulegri baðferð í Sundlaug Álftaness, sem flestir ættu að vita hvar er eftir óverðskuldaðar fréttafyrirsagnir.
Sem fyrr minni ég á að upplýsingarnar í töflunni eru úr GPS tækinu mínu, en ekki af löggildu landakorti. Hæsti punktuinn er hæsti punktur ferðarinnar en ekki fjallsins. Hér að neðan er einnig hægt að sjá gönguleiðina í PDF-skjali

Fleiri myndir hér!

Einnig er að finna fleiri myndir á myndavef Ferðafélags Íslands.

Fjall:	Grímannsfell í Mosfellsdal
Dagur:	sun 31-01-2010
Upphaf kl:	11:07
Hæsta punkti náð kl:	13:07
Uppgöngutími:	2 klst
Göngulok kl:	14:36
Göngutími alls:	3 klst 29 mín
Upphafshæð GPS:	84 m
Mesta hæð GPS:	459 m
Hækkun:	375 m
Göngulengd GPS:	8,9 km

Skrár tengdar þessari bloggfærslu:

• Gönguleiðin á Grímannsfell

Mosfell 24.01.2010

Um 160 manna hópur gekk á Mosfell í Mosfellsdal í rigningu, roki og litlu skyggni. Leiðin var aurblaut á mörgum stöðum upp í ökkla eftir skyndileg hlýindi. Mér þótti þetta þokkalega gaman þó að myndavélin mín hafi verið á öðru máli. Skyggnið var ekki mikið þegar upp var komið en útsýnið er örugglega flott í góðu veðri. Uppi á toppnum söng hópurinn svo saman "kátir voru karlar" áður en haldið var aftur af stað niður. Ég þurfti að setja göngugallann í þurrk og þvo skóna mína eftir þessa stuttu en skemmtilegu ferð. Fór svo í sundlaug Álftaness, sund, sauna og heitan pott til að skola af sjálfum mér. Það er fátt betra en að enda svona dag með laugarferð. Hér að neðan er hægt að sjá kort af gönguleiðinni í PDF-skjali (sundlaugaferilinn fylgir ekki). 
Athugið að upplýsingarnar í töflunni eru úr GPS tækinu mínu eins og áður.

Fleiri myndir hér!

Einnig er hægt að sjá meira á myndavef Ferðafélags Íslands 

Fjall:	Mosfell í Mosfellsdal
Dagur:	sun 24-01-2010
Upphaf kl:	11:00
Hæsta punkti náð kl:	11:52
Uppgöngutími:	52 mín
Göngulok kl:	12:30
Göngutími alls:	1 klst 30 mín
Upphafshæð GPS	74 m
Mesta hæð GPS	296 m
Hækkun:	222 m
Göngulengd:	3,7 km

Skrár tengdar þessari bloggfærslu:

• Gönguleiðin á Mosfell

Úlfarsfell 17.01.2010

Fjölmennur hópur gekk á Úlfarsfellið. Lagt var af stað við bílastæði skógræktarinnar við Vesturlandsveg. Veður var milt og gott eins og sjá má af myndum.  Hægt er að sjá kort af gönguleiðinni í PDF-skjali hér að neðan. Upplýsingar í töflunni hér að neðan eru úr GPS tækinu mínu en ekki af löggildu korti.

Fleiri myndir

Einnig er að finna fleiri myndir á myndavef Ferðafélags Íslands

Fjall:	Úlfarsfell við Mosfellsbæ
Dagsetning:	sun-17-01-2010
Upphaf kl:	11:00
Hæsta punkti náð kl:	11:55
Uppgöngutími:	55 mín
Göngulok kl:	12:46
Göngutími alls:	1 klst 46 mín
Upphafshæð GPS	61 m
Mesta hæð GPS	308 m
Hækkun GPS	245 m
Göngulengd:	4,0 km

Skrár tengdar þessari bloggfærslu:

• Gönguleiðin á Úlfarsfell